Qaynar münaqişələrin demək olar ki, bütün iqtisadiyyatları böhrana sürüklədiyi bir dövrdə, xüsusilə Rusiya ilə xarici ticarətini rekord səviyyəyə qaldıran Çin sakit və sabit şəkildə irəliləməyə davam edir:
Hafta.az yazır ki, Çinin xarici ticarəti iyunda son illər ən güclü göstəricilərindən birini göstərdi. Çin Gömrük Administrasiyasının məlumatlarına görə, ölkənin xarici ticarət həcmi illik müqayisədə 30,6 faiz artaraq 699,2 milyard dollara çatıb. İxrac 27 faiz artaraq 412,4 milyard dollara yüksəlib ki, bu da son dörd ayda ən sürətli artımı qeydə alıb, idxal isə 36 faiz artaraq 286,8 milyard dollara çatıb ki, bu da son beş ildə ən güclü artımı göstərir. Süni intellekt investisiyalarının qlobal artımı çiplərə və İT avadanlıqlarına tələbatı artıraraq ixracı dəstəkləyib.
İlin ilk altı ayında Çinin xarici ticarət həcmi 21,2 faiz artaraq 3,7 trilyon dollara çatıb. Bu dövrdə ixrac 17,6 faiz artaraq 2,13 trilyon dollara, idxal isə 26,6 faiz artaraq 1,55 trilyon dollar olub. İdxalın ixracdan daha sürətli artması səbəbindən ticarət profisiti ötən ilin eyni dövründəki 586 milyard dollardan 576 milyard dollara düşüb.
Rusiya ilə Çin arasında ticarət də güclü artımını davam etdirib. İlk altı ayda iki ölkə arasında ticarət həcmi 25,6 faiz artaraq 134,2 milyard dollara çatıb. Çinin Rusiyaya ixracı 28,4 faiz artaraq 60,6 milyard dollara, Rusiyadan idxal isə 23,3 faiz artaraq 73,6 milyard dollara çatıb. İyunda ikitərəfli ticarət həcmi 24,4 milyard dollar olub. Bu artım Rusiyanın enerji ixracının artması və Çin maşınqayırma, elektronika və istehlak mallarına tələbatın artması ilə əlaqədardır.
Çinlə ABŞ arasında ticarət həcmi ilin birinci yarısında əsasən dəyişməyib - 289,1 milyard dollar olaraq qalıb. Çinin ABŞ-a ixracı 0,2 faiz artaraq 215,9 milyard dollara, ABŞ-dan idxal isə 0,8 faiz azalaraq 73,2 milyard dollara düşüb. Əksinə, Avropa Birliyi ilə ticarətdə Çinin ixracı 16,8 faiz artaraq 312,3 milyard dollara, AB-dən idxal isə 8,7 faiz artaraq 135,6 milyard dollara çatıb.
